સ્ક્વેર કટ - 30-08-2026

 સ્ક્વેર કટ | અધીર અમદાવાદી | ૩૦-૦૮-૨૦૨૬ ગુજરાત સમાચાર રવિપૂર્તિ

· આટલું બધું ભેળસેળવાળુ બનાવે અને વેચે છે, એ લોકોની સજા શું હોવી જોઈએ?

        - રાજેશકુમાર દરજી, અમદાવાદ

~ માંદા પડે તો ભેળસેળવાળી દવાઓ પછી સ્મશાનમાં ભીનાં લાકડાં.

· પતિ-પત્નીના સંબંધમાં દોસ્તી વચ્ચે આવે તો સંબંધ તોડાય કે દોસ્તી?

        - કિંજલ ચૌધરી, બનાસકાંઠા

~ દોસ્તી સાથે આવે, વચ્ચે નહીં.   

· જિંદગી જીવી કોને કહેવાય અને પસાર કરી કોને કહેવાય?

        - જેનાબ બલોચ, વડોદરા

~ અમદાવાદી ફાફડા જલેબી ખાવ એ જીવી ગયા, બાકી બધુ પસાર કર્યું કહેવાય.

· નિરાંતે કયું કામ કરાય?

        - નયનભાઈ પટેલ, ભરૂચ

~ અનાનસ છોલવાનું.

· ક્રિકેટ વધારે ચડિયાતું કે ફૂટબૉલ?

        - અંશ મેવાડા , પાલનપુર

~ ક્રિકેટમાં અપજશના ચાન્સ વધારે હોં ! 

· ટૂંકા ગાળામાં પેટ્રોલના ભાવ ઘટવાની શક્યતા કેટલી?

        - દિપકભાઈ મહેશચંદ્ર પંડ્યા, બીલીમોરા

~ જેટલી તમારી હામાં તમારી પત્ની હા કરે એટલી.  

· ફુવા અને કૂવા વચ્ચે શું સમાનતા છે?

        - રાકેશ પટેલ, અમદાવાદ

~ બેઉ ઉછળે છે.

· ‘સાંજે જમવામાં શું બનાવું’ સવાલનો જવાબ તમે શું આપો છો?

        - તૃપ્તિ ઠાકર, અમદાવાદ

~ ‘તને ગમે તે’ તો નથી જ આપતો, નહીંતર દાળઢોકળી ખાવી પડે.

· ચોમાસાના દિવસ છે, છત્રી ગોળાકાર જ કેમ હોય છે?

        -શશિકાંત જે. દેસલે, સનિયા કણદે, સુરત 

~ છત્રી દિવસે જ નહીં રાત્રે, અને શિયાળા-ઉનાળામાં પણ ગોળ જ હોય છે.

· પેપર લીકની જેમ ઘરની છત લીક થાય તો આંદોલન કરવા ક્યાં જવું?

        - અરવિંદ ચૌહાણ, મોદજ

~ છત પર.

 · પ્રેમિકાના બીજા સાથે લગ્ન થતા હોય ત્યારે કયું ગીત ગવાય?

        - વિનોદભાઈ પરમાર, સુરત

~ અજીબ દાસ્તાં હૈ યે. કહાં શૂરુ કહાં ખતમ...  

· ચાઈનીઝ પફમાં ઉંદર બેક્ડ કરેલો મળે તો એ ઑથેન્ટિક ચાઈનીઝ કહેવાય?

      - રુચિર દવે, જામનગર.

~ ચાખ્યા સિવાય કશું કહી ના શકાય.

· દેશી છુટાછેડા અને વિદેશી છુટાછેડા વચ્ચે ફરક કેટલો?

        - ઘનશયામ એચ. ભરુચા, વિરાર

~ હવે એમાં ડેસ્ટિનેશન છૂટાછેડા ના હોય !

· આ AI માણસને ‘પોપટ’ બનાવી દેશે?

        - રોહિત 'કર્મ', હિમ્મતનગર

~ ચપટીમાં. 

· શું વરસાદ તોફાની બેટિંગ જ કરે? બોલિંગ કેમ નહીં?

        - અમૃત સોલંકી, બોટાદ
~ વરસાદની તોફાની બેટિંગ પછી મેદાનમાં પાણી ભરાઈ જાય. પછી બોલિંગ ના આવે.

· ઘડિયાળ ફાસ્ટ ક્યારે ચાલે અને સ્લો ક્યારે ચાલે?

        - ઈબ્રાહીમ ગરાસિયા, વડોદરા

~ પત્નીને અનુક્રમે સ્ટેશન લેવા અને મૂકવા જતાં.

· પત્નીના હાથમાં પગાર આપવાના ફાયદા-ગેરફાયદા શું?

        - મહાસુખ દરજી, અમદાવાદ

~ તમને ઓવરટાઈમ કરવાનું કારણ મળે. ઓવરટાઈમ કરો એટલે ઘેર ધુલાઈ થાય.

· પ્રેમ તથા કાનૂન બન્ને આંધળા શા માટે કહેવાય છે?

        - યોગેશભાઈ આર જોશી, હાલોલ

~ પહેલામાં આંખ પર પટ્ટી હોય છે અને બીજામાં દિમાગ પર.

· ભ્રષ્ટાચાર દરેક જગ્યાએ વધી રહ્યો છે, કયારે આ ભૂખ ભાંગશે?

        - કિશોર ભટી, વાંકાનેર

~ ૩૦મી ફ્રેબ્રુઆરીએ.  

· તમે આવા રમૂજી જવાબ આપવા માટે શું ખાવ છો?

        - જ્યોતિષ પાઠક, વડોદરા

~ માર. કોનો એ કહેવું પડશે?