યે જવાની હે દીવાની સ્લો પોઈઝન છે

યે જવાની ... સ્લો પોઈઝન છે. એટલું સ્લો કે એ સાલું મારતું પણ નથી. ‘દિલ ચાહતા હૈ ..’ નું એક વધુ વર્ઝન એવું આ યે જવાની ... માં સ્ટોરી કંઈ નથી છતાં એમ કહી શકાય કે સ્ટોરી બે બેફીકરા દોસ્ત અને એમની એક ઘોડા જેવા દાંત અને આફ્રિકન સ્ત્રી જેવા હોઠવાળી વિદેશી દેખાતી દોસ્ત (કલ્કી)ની આસપાસ છે જે ટોળકીમાં એક ચશ્મીસ સીરીયસ ટાઈપ (અન્ગુરની દીપ્તિ નવલ જેવી દેખાતી) દીપિકા ઉમેરાય છે. બેફીકરા છોકરાં દાઢી ન કરે એ નાતે વિદ્યાનો દિયોર (આદિત્ય) ફૂલ દાઢીમાં અને આપણો ચોકલેટ બોય હાફ શેવમાં ફરે છે.

 આ તરફ કરણ જોહરના ધર્મા  પ્રોડક્શનની બનાવેલી આ ફિલ્મમાં ‘કલ હો ન હો’ ની જેમ જ હિરોઈનનું નામ નેના છે અને આ નેનાનાં ચશ્માં પણ એન્ટીક છે. દીપિકા ફિલ્મ આગળ વધે પછી અપેક્ષિત રીતે પાંસળીથી કેડ સુધી પેટની ગોરી સપાટ સપાટી અને કમરના આછાપાતળા વળાંકો પ્રેક્ષકો માટે ખુલ્લા મૂકે છે. પણ એનાંથી પ્રેક્ષકો કે રણબીર રીઝતાં નથી. સ્કુલથી સ્ટુડીયસ અને ચશ્મીસ એવી નેના ડોક્ટર થયા પછી પણ, અને અન્ય ડિઝાઈનર કપડાં પહેરવા છતાં ચશ્માં તો પેલા એન્ટીક જ પહેરે છે. ડોક્ટર હોવા છતાં એને ચશ્માના નંબર ઉતારવાના ઓપરેશનમાં વિશ્વાસ નથી એવું પણ ડાયરેક્ટર આડકતરી રીતે કહેવા માંગે છે.

આખું ટોળું ટ્રેકિંગ કરવાં મનાલી જાય છે. અને ત્યાં સુંદર પગવાળી, સુંદર નહી, છોકરીઓ સ્કર્ટ અને શોર્ટ પહેરીને ટ્રેકિંગ કરે છે. આપણી નેના હજુ ઇન્ટ્રોવર્ટ છે, ભણવાની બુક્સ લઈને એ ટ્રેકિંગ કરવા આવી છે પણ મારામારીથી માંડીને ટ્રેકિંગમાં એ સૌથી આગળ છે. અડધી ફિલ્મ આ નેનાને કન્વર્ટ થતી બતાવવામાં બરબાદ થાય છે. જોકે અંતે કોણ કન્વર્ટ થાય છે એ જાણવા માટે તમારે આ ફિલ્મ જોવાની જરૂર નથી. ફિલ્મનો અંત મુવી રીવ્યુમાં ન કહેવો એવો રીવાજ છે એટલે નથી કહેતો પણ વેક અપ અને દિલ ચાહતા હૈ જોયું હોય એમનાં માટે આ કેબીસીમાં પૂછાતા પહેલાં સવાલ જેટલો સહેલો પ્રશ્ન છે.

વેક અપ સિડની જેમ રણબીર અહિં ફોટોગ્રાફર કમ વિડીયોગ્રાફર તરીકે ટીવી શો કરે છે. એનો મુડ અષાઢના તડકાની જેમ વારેવારે બદલાયા કરે છે. લાઈફમાં બધું જોવા માંગતો રણબીર અમેરિકા જાય છે પણ જતાં જતાં એ નેનાના નેનોમાં પ્રેમ નથી જોઈ શકતો. છેવટે પેલી ઘોડાદાંતના લગનમાં એ આઠ વરસે પાછો આવે છે. રણબીર સુપર સ્ટાર બની રહ્યો છે એવું ઘોંઘાટિયા ‘બદતમીઝ’ ગીતમાં આદિત્યની બાદબાકીથી લાગે છે. વચ્ચેના સમયમાં વિદ્યાના દીયોરે બાર ખોલ્યો હોય છે, ઘરાક ન આવે તો દિવસના અંતે તુંન્ન્ન થઈને પડી તો શકાય ને એટલે. ફિલ્મમાં દારૂનું એટલું પ્રાધાન્ય છે કે ઘોડાદાંતના લગ્ન પ્રસંગમાં લોકોને ખાતાં એકપણ વાર નથી બતાવ્યા ખાલી પીતાં જ બતાવ્યા છે. પણ રાજસ્થાનના ઉદેપુરમાં લગ્ન હોય અને ખાવાનું ન હોય એવું તો બને જ ક્યાંથી? આખી ફિલ્મમાં એટલી વાર દારુની બાટલી ખુલી છે કે ગ્લાસમાં રેડાયો છે કે ફિલ્મ ગુજરાતમાં બની હોય એવું લાગે છે. કરણ ઢીલ્લાના ભેજામાં જે ઘુસ્યું તે ખરું !

અંતમાં ચોકલેટી પેરીસ જશે કે નેનાના પ્રેમમાં પડી ઇન્ડિયા રોકાઈ જશે, એ જોવા રૂપિયા ન ખર્ચતા, ક્યાંક ધર્માદા કરી દેજો !

જમાઈ કુજમાઈ થાય પણ સસરા કુસસરા ન થાય

| મુંબઈ  સમાચાર | ઉત્સવ સપ્લીમેન્ટ | લાતની લાત ને વાતની વાત | ૦૨-૦૬-૨૦૧૩ | અધીર અમદાવાદી |

આમ તો જમાઈઓને બદનામ કરવા એમને દશમા ગ્રહની ઉપમા અપાય છે. પણ અત્યારે જમાઈઓની કુંડળીમાં કોઈ ગ્રહ વક્રી હોય એવું લાગે છે. રોબર્ટ કુમાર પછી કોઈએ મોટા માથાઓના જમાઈઓનો એક પછી એક વારો કાઢ્યો હોય એવું લાગે છે. જોકે મોટા માથાના જમાઈઓને છેવટે ક્લીન ચીટ આપવાનો ભારતમાં રીવાજ છે. શોર્ટ ટર્મમાં બદનામી જરૂર મળે છે પણ અંતે તો ઘીના ઠામમાં ઘી, સ્વીસબેંકમાં ડોલર અને લોકરોમાં ગોલ્ડ પડ્યું રહે છે!

આમેય કૌભાંડ કે કાંડમાં સંડોવાય એ વ્યક્તિ પરણિત હોય તો એ કોઈની જમાઈ તો હોવાની જ. આ સૃષ્ટિનો અફર નિયમ છે. એ રીતે જોઈએ તો દરેક જમાઈ સસરાને નામોશી અપાવી શકે છે. અને આમેય જમાઈની મથરાવટી મેલી છે. પણ આ મય્પ્પનની ધરપકડથી શ્રીનિવાસનને રાજીનામું આપવાનું કહેવામાં આવે એ ‘બહોત નાઈન્સાફી હૈ’. હજુ તો મુરબ્બી શ્રીનિવાસને ઘણા કાવાદાવા કરવાના બાકી છે. અને જમાઈ કુજમાઈ થાય એટલે સસરાને કુસસરા કેહવા એ ક્યાંનો ન્યાય છે? છોકરો ‘સ્ટ્રેઈટ’ નથી, તેથી બાપ એવા બેટા નાતે કોઈ શ્રીનિવાસને વાંકો કહી શકે, પણ જમાઈ એવા સસરા એવું હોવું જરૂરી થોડું છે? છતાં ઘણાં લોકો એવું માને છે કે બીસીસીઆઈ નામનાં સાસરામાં માય્પ્પ્નને સસરા પીરસનાર હોય તો લાભ જરૂર થાય.

આપણને વાતવાતમાં જ્યાં જોવાનું કહેવામાં આવે છે એવા અમેરિકામાં વોટરગેટ અને મોનિકા કાંડ ભલે થાય પણ ત્યાં કદી સન-ઇન-લો કાંડ નથી થયા. કારણ કે અમેરિકા જેવા દેશમાં જ્યાં લોકો મા-બાપમાં જ ખાસ માનતા નથી ત્યાં જમાઈ થકી સસરા સુધી રેલો ક્યાંથી આવે? પછી અમેરિકામાં કરપ્શન કે સગાવાદ નથી એવી ચર્ચાઓ બૌદ્ધિકો કરે, એમાં અમેરિકા દેશની પોતાની કોઈ ખૂબી છતી નથી થતી. આ તો ત્યાંની સંસ્કૃતિ જ એવી છે. આપણે ત્યાં તો ‘આમ તો અમારે એ દુરનો ભાઈ થાય, પણ સગ્ગા ભાઈ કરતાં વધારે’ એવી વાત કરવામાં ગર્વ લેવામાં આવે છે. એટલે જ જો આપણે ત્યાં કોઈ નેતા કે વગદાર માણસના પુત્ર, પુત્રી, જમાઈ, ભત્રીજા કે ભાણિયા થકી કરપ્શન કરવામાં આવે તો એ આપણી સંસ્કૃતિની દેન છે એમ માની નજરઅંદાજ કરવું જોઈએ. એમાં જમાઈનું તો ખાસ. કારણ કે જમાઈને આપણે ત્યાં હજુ પણ ભગવાનની જેમ પૂજવામાં આવે છે. લગ્નમાં હજુ પણ સાસુ-સસરા જમાઈના પગ ધૂવે છે.

પહેલાના જમાનામાં જમાઈઓના નખરાં પણ ભારે રહેતા. એમની સરભરા થતી નહિ, કરવી પડતી હતી. જમાઈ જાતે પાણી પણ ન પીવે. કોઈએ આપવું પડે. જમાઈને કાચના કપ-રકાબીમાં ચા આપવી એ અપમાન ગણાતું, એમને સ્ટીલના કપ-રકાબીમાં ચા અપાતી, ભલે પછી પેલો દાઝી મરે! અને જમાઈ આવવાના છે એવા સમાચાર આવે એટલે કાચાપોચા હ્રદયની સાસુઓ ફફડી ઉઠતી. મજબુત હ્રદયનીઓ ફફડી ન ઊઠે તો બીજાને ફફડાવીને પણ જમાઈની યથાયોગ્ય ખાતિરદારી તો કરતી જ. જમાઈ સાસરે આવે તો એની સારસંભાળ હજુ પણ લેવાય છે. પહેલાના વખતમાં જમાઈને જમવા બેસાડે તો સામે બાજઠ પર થાળી મુકાતી. ઘરની મુખ્ય સ્ત્રી એને બધું પીરસાય એ જોવાં ખડે પગે હાજર રહેતી. હવે તો બહારથી પિઝા અને આઈસ્ક્રીમ મંગાવી ખવડાવવામાં આવે છે. કારણ કે ઘરનું ખાવાનું ખાય એવા જમાઈ આજકાલ સર્ચલાઇટ લઈને શોધો તો પણ જડે નહિ. ને છોકરીઓ પણ એટલી આગળ નીકળી ગઈ છે. એ પતિને પોપટ જેવો બનાવી શકે છે. ને બજારના પીઝામાં કયો જમાઈ વાંધો કાઢવાનો છે? એટલે જ આજકાલ જમાઈ દીકરા સમાન થતાં જણાય છે.

આ જમાઈઓ માટે સાસરાપક્ષ લાંબો થાય એ કંઈ આજકાલનું નથી. છેક મહાભારતમાં ધ્રુપદની સેના અર્જુન અને પાંડવો તરફે ઊભી જ હતી. ટીએડીએ ક્લેઈમ કર્યા વગર ૧૮ દિવસ લડાઈ પણ લડી હતી. ગાંધારોએ ધુતરાષ્ટ્ર પુત્ર દુર્યોધનનાં કલ્યાણ અર્થે શકુનિને હસ્તિનાપુરમાં પરમેનન્ટ ઇન્સ્ટોલ કરેલો હતો. તો કંસ માટે જરાસંઘ ખાલી દોસ્તી ભાવે થોડો ઘસાતો હતો? જરાસંઘની દીકરીઓ અસ્તિ અને પ્રાપ્તિ કંસને પરણાવી હતી. એટલે જ તો મહાસમર્થ શ્રીકૃષ્ણ સાથે વેર જમાઈ કંસની સદભાવના મેળવવા જ તો જરાસંઘે ઉભું કર્યું હતું. અને યુગપુરુષ કૃષ્ણ પણ અર્જુન નામનાં બનેવીના સારથી બનેલા એ ક્યાં કોઈને યાદ કરાવવું પડે એવું છે?

મહાભારતમાં જ મહાયોદ્ધા અભિમન્યુને મારનાર જયદ્રથ ધુતરાષ્ટ્રનો જમાઈ હતો. આપણે ભલે એને આદર્શ ન માનીએ પણ સસરા અને સાળા માટે એણે જાન આપ્યો હતો. ખુદ કૃષ્ણે એને મારવા સૂર્યાસ્તનું નાટક કરવું પડ્યું હતું. આજકાલ તો એવા જમાઈઓ પણ ક્યાં પાકે છે? કોઈને એવો પણ પ્રશ્ન થાય કે શું આદર્શ જમાઈઓ હવે નહિ પાકતા હોય? કદાચ પાકતા હશે. પણ એવા જમાઈ પેદા કરવા માટે આદર્શ સસરો જોઈએને? ભગવાન રામને આદર્શ ગણવામાં આવે છે. પણ રામને જમાઈ તરીકે સિલેક્ટ કરવા માટે શ્વસુર જનકે આકરી પરીક્ષા રાખી હતી, જેમાં ખુદ રાવણ ફેઈલ થયો હતો. આજકાલ આવી પરીક્ષાઓ ક્યાં થાય છે કે રામ જેવા જમાઈ મળે? એટલે જ આપણે જેવા મળે તેવા જમાઈઓથી કામ ચલાવી લેવું પડે છે.

આ બધા વચ્ચે જમાઈઓમાં સુપર જમાઈ જો કોઈ હોય તો એ છે અક્ષય કુમાર. ગુજરાતીઓમાં જમાઈને માન આપવા નામ પાછળ ચન્દ્ર, કાન્ત, રાય, કે કુમાર લગાડવાની એક જમાનામાં ફેશન હતી. અક્ષય પંજાબી છે પણ એનાં નામ પાછળ જમાઈ બન્યા પહેલેથી જ કુમાર લાગેલું છે. સૌને ખબર છે કે એ ગુજરાતણ ડિમ્પલબેન અને રાજેશ ખન્નાનો જમાઈ છે. એણે એનાં સસરા કાકા માટે જે કર્યું એનાંથી કદાચ કાકાનો અંત ચોક્કસ સુધર્યો. જમાઈ હો તો ઐસા!